وصية ابو مشعاب الله يرحمه..

يقول الشاعر / عوض الله بن حميد السلمي
ياقبر قلي عن زمــــان الاقامـــــه
كم عام يقدر ينتقل منـك راعـــــيك
ودي توضح لي شروط السلامـــه
من ضمتك من ظلمتـــك من بلاويك

رد القبر /
ياذيب من ينشد يثمـــن كلامـــــه
راجع خطياتك وراجع حسانيـــك
تبقى بجوفي لين يــوم القيـــــامه
محدن يجي عندك ولا يتصل فيك


رد الشاعر /
وان كانت الاعمال خامه وخامـــه
منها ذهب صافي ومنها سراميك
ممكن تفيد المعـــــذره والنـــــدامه
بعد نزولي بالكفن في ضواحيــك

رد القبر /
فوقك ليا جات النصايب علامـــه
ثنتين توضع عند راسك ورجليك
ماعاد ينفعـك العتــب والملامـــــه
من حين روحك ترتفع عند باريك

رد الشاعر/
ياقبر ما دورت منــك الكرامـــه
ارجو عفو ربي ولاني براجيك
اللي بديه الامر ماسك زمامــه
رب الملوك ورب كـل المماليـــــك


رد القبر/
ياذيب في هذا التحدي غشامــه
بلا عمل ماهو مناسب تحديـــــك
اوصيك عهد الله صون التـــزامه
مني ومن بعدي من النار ينجيك

رد الشاعر/
ياقبر زودت المخـــاوف جسامـــــه
زدني نصايح نافعه قبل ما جيـــك
اخاف اجي لك فوق ظهري غرامه
وتسديدها ما يقبل الدفع بالشــيك

رد القبر /
اقرأ كتاب الله وافهــــم نظامـــــه
وتلقى الذي يعني لغيرك ويعنيـــك
واختار ما يعنيك وامسك خطامـــه
ما دمت حي خطام الاعمال بيديك...
دعواتكم لشاعر ابو مشعاب
عوض الله حميد السلمي
انتقل الى رحمة الله اليوم
هذه وصية منه

صح لسان القايل وغفر الله للشاعر الكبير عوض الله السلمي ابو مشعاب واسكنه فسيح جناته

وشكرا على النقل

لاعدمناااك

الله يرحمه ويتجاوز عنه ويجعل قبره روضه من رياض الجنه كان إسطوره رحمه الله وكان له هيبه عند الشعار يحسب له الف حساب الله يغفر له

مجاراه رائعه ووصيه أروع الف شكر شيهانه على النقل الجزل

القصيدة ليست للشاعر عوض الله ابو مشعاب البقيلي ..

رحمه الله رحمة واسعه ..

اخ عوض هذا ماتداول وانتشر
ولأعلم صحته واذا تعلم بالصحه هاتي الدليل
شاكره لكم مروركم
لاعدمتكم

حياك الله شيهانة

نعم مثل ماتفضل الاخ عوض القصيدة ليست للعلم عوض الله رحمه الله رحمة واسعة
فقد ظهر ابنه غازي وصرح بهذا ان القصيدة ليست منسوبة لوالده

شكرا جزيلا على هذا الحرص ويعطيك العافية والصحة

مجاره رائعه وقصيده جزله .

رحم الله ابو مشعاب رحمة واسعه واسكنه فسيح جناته