(فــــــــمان الله)
فمان الله يأول من سكن بيـن الضلـوع العـوج
عسى دربك سفيـر وياعسـى الله مـا يخلينـي
توكل لا توادع رح عسى درب الجفـا المسهـوج
يصادف درب فرقى عقبهـا مـا تلمحـك عينـي
سمحت من الهوى ومن القصيد ومن زراق الموج
ورميت أغلى مجاديـف الغـرام وجيـت بيدينـي
أبغرق في عذابك لا رحلـت ويصبـح المنتـوج
قصدً فـي حياتـي سلوتـي وان مـت يرثينـي
اذا هبن بنات الريـح للذكـرى بـدون سـروج
ابسرج مهرة النسيـان وارحـل مـن عناوينـي
وابنسى لين اسج وبرسل الونـات فـوج وفـوج
وبنسى دمع عيني ينتثـر وانسـاك مـن حينـي
صبور؟ أي والله اني ما ثنيت العـزم قبـل ادوج
بريضان الجفا واضمـا لوصلـك ليـن تسقينـي
شجاع: إي والله اني ما عرفت الذل قبـل اسـوج
قدم رجلـي علـى درب لبيـت أهلـك يودينـي
كريم؟ إي والله اني ما عرفت الشح قبـل تـروج
دموعي في عيوني ثـم اشـح بحسرتـي فينـي
احبك؟ حسبي الله ليت مالك في سمـاي بـروج
ولالك في البسيطة كـود شـيء بينـك وبينـي
دخيلك لا تلفـت رح بفالـك واتـرك المرجـوج
تغانم مابقـي لـك ولا أنـا مـا عـاد يمدينـي
فمان الله سق ركبك على درب السنيـن العـوج
ولكـن طالبـك لا أقفيـت عـنـي لا تخليـنـي